இருபதுக்கும் மேற்பட்ட இன்ஜினியரிங் கல்லூரிகளுக்கு மூடுவிழா?

TNEA Admission 2020: இந்த ஆண்டு இருபதுக்கும் மேற்பட்ட கல்லூரிகளில் Engineering Admission 2020 நடைபெறாது என்று தெரிகிறது

பல்கலைக்கழக இணைப்பு அந்தஸ்துக்கு விண்ணப்பிக்காததாதல், இந்தாண்டு இருபதுக்கும் மேற்பட்ட இன்ஜினியரிங் கல்லூரிகள் மாணவர் சேர்க்கை நிறுத்தப் போவதாக தெரிகிறது.               

தமிழகத்தில் தற்போது சுமார் 533 இன்ஜினியரிங் கல்லூரிகள் இயங்கி வருகிறது. ஒவ்வொரு ஆண்டும் இந்த இன்ஜினியரிங் கல்லூரிகளில் இருந்து லட்சக்கணக்கான பொறியியல் பட்டதாரிகள் படித்து முடித்து வெளியேறுகின்றனர். நல்ல மதிப்பெண்களுடன் முதல் வகுப்பில் தேர்ச்சி பெறும் மாணவர்களுக்குக்கூட சரியான வேலை கிடைக்காத சூழலே நிலவி வருகிறது. இதன் காரணமாக கடந்த சில வருடங்களாக இன்ஜினியரிங் கல்லூரிகள் மீதான மோகம் குறைந்து, மாணவர் சேர்க்கை கடுமையாக பாதித்தது.

இந்த சூழலில் தற்போது தமிழகத்தில் இருபதுக்கும் மேற்பட்ட இன்ஜினியரிங் கல்லூரிகளில், 2020-21 கல்வியாண்டிற்கான மாணவர் சேர்க்கையை நிறுத்தப்போவதாக தகவல்கள் வந்துள்ளது. பல்கலைக்கழக விதிமுறைகளின்படி, இன்ஜினியரிங் கல்லூரிகள் பல்கலைக்கழக இணைப்பு அந்தஸ்து பெற வேண்டும். அவ்வாறு இணைப்பு அந்தஸ்து பெற்றால் தான் மாணவர் சேர்க்கை நடத்த முடியும்.

அண்ணா பல்கலைக்கழக இணைப்பு அந்தஸ்து பெறுவதற்கான கால அவகாசம் பிப்ரவரி 17 ஆம் தேதியோ முடிவடைந்து விட்டது. தாமதக்கட்டணம் 25,000 ரூபாய் செலுத்தி விண்ணப்பிப்பதற்கான கடைசி தேதி பிப்ரவரி 21 என்று அறிவிக்கப்பட்டுள்ளது. இந்த சூழலில் இருபதுக்கும் மேற்பட்ட கல்லூரிகள், இணைப்பு அந்தஸ்து பெறுவதற்கு கால அவகாசம் கேட்டுள்ளது. மேலும், 10 கல்லூரிகள் இணைப்பு அந்தஸ்து பெறுவதற்கு எந்த நடவடிக்கையும் எடுக்கவில்லை.

ஏற்கனவே அண்மைக்காலமாக பெரும்பாலான இன்ஜினியரிங் கல்லூரிகளில் மாணவர் சேர்க்கை வெகுவாக குறைந்து வருகிறது. தற்போது இணைப்பு அந்தஸ்து பெற விரும்பாததை வைத்து பார்க்கும் போது, 2020-21 கல்வியாண்டில் இருபதுக்கும் மேற்பட்ட இன்ஜினியரிங் கல்லூரிகள் மூடுவிழா காணும் என்றே எதிர்பார்க்கப்படுகிறது.